Streektaelpries

We hebben een mooie middag/aovend had in Roden. Ik hebbe Fettje an et begin van de middag anhaeld in Noordwoolde en mit heur bin ‘k naor Roden gaon. In Roden troffen we Jelle en Gerda in de Winsinghhof. Daor wodde vandemiddag bekendmaekt wie de Streektaelpries van et Dagblad van et Noorden veur meziek en proza/poëzie kregen over 2020/2021. Ik was nommeneerd veur mien thriller Et liek in de Lende. We hebben geneuten van een prachtig pergramme. Jan Henk de Groot en The Serenade Sisters zongen prachtige lieties. En dan Tonko Ufkes… Hi’j vertelde zien schitterend mooie verhael De bonte vliegenvanger uut zien nommeneerde bundel De weg dreumen. Veur dat bewuste verhael kreeg hi’j indertied de Duutse Freudenthalpreis! Wat de meziek anbelangt gong de Streektaelpries naor de Grunninger zanger Erwin de Vries veur zien cd Antwoord. Alle meziek-nommeneerden weren in Roden. Dat was wat de schrievers anbelangt wel even aanders. Van de negen nommeneerden stonnen d’r op et laeste mar drieje op et podium. Tonko Ufkes, Martin Koster (nommeneerd veur Een goed stuk vleis) en een zekere Johan Veenstra. De rest wol niet op et podium, was verhinderd of niet kommen. Tonko, Martin en ik kregen bloemen en een cheque van 101 euro. De winner was d’r niet… Dat was Roelof Keen. Hi’j het de Streektaelpries wunnen mit zien boek Koken met Keen. Een humoristisch Drents kookboek. Nao ofloop bin ‘k mit Fettje, Jelle en Gerda naor resteraant De Pompstee gaon. Daor wa’k deensdag trouwens ok al… We hebben d’r eerst wat drinken en bitterballen had. Laeter hewwe d’r ok waarm eten had. Al mit al is Boer zuukt vrouw d’r vanaovend bi’j inscheuten… Hieronder een foto die Gerda maekt het. Van links naor rechts op et podium van de Winsinghhof: Tonko Ufkes, Johan Veenstra, Martin Koster en Evert van Dijk, de heufdredakteur van et Dagblad van et Noorden. Et was een mooie dag!