Streektaelpries

Vandaege hebben de beide tuunmannen d’r veur de laeste keer van ’t jaor west. Ze hebben de tuun opredded, alle blad bi’j mekeer harkt en mitneumen, de geuten schonemaekt en de dooie buxussen d’r uutspit en daor aandere heesters veur in de plak zet. Ik hebbe ze vandemorgen zelsbakte kruudkoeke en tussen de middag poddestoelesop veurzet. Et is now hatstikke mooi om huus henne. Ze hebben me de grote agave in de gerage zet veur et geval d’r vost kommen mag. Doe ze vot weren, he’k nog een kokeskoeke bakt.

En dan nog even over gister doe d’r zuver wat droevige en gremietige mails kwammen van de Drentse schriever Anne Doornbos en Schrieversronte-direkteur Abel Darwinkel. Et Dagblad van et Noorden stopt mit de jaorlikse Streektaelpries. Daor komt een twiewekelikse Ni’jsbrief veur in de plak daor ze op 16 jannewaori mit beginnen zullen. Heufdredakteur Evert van Dijk vreug me een schoffien leden as daor ok wel es kollums van mi’j uut de Liwwadder Kraante in mochten. Dat moch wat mi’j anbelangt wel. Hi’j vertelde doe niet dat ze mit de Streektaelpries stopten. Dat vint haost iederiene meer as spietig. Et is gewoon doodzunde. Winners van de pries zullen een brief sturen en dat doen de verschillende streektaelorgenisaosies ok. De Streektaelpries veur literetuur en meziek beston sund 2006. Ik hebbe de pries twie keer wunnen. In 2009 veur mien roman Et geheim van de wiend en in 2015 veur de roman Een vrouw van ivoor. Ik bin ok twie keer nommeneerd. In 2007 tegere mit Peter Hiemstra veur Longerlaand en in 2020/2021 veur de thriller Et liek in de Lende.

Hieronder nog een foto van de flamingo’s die ‘k gister in de Orchidenenhoeve in Luttelgeest maekt hebbe.