Streektaelmaond

Eerst nog even over gister. Ik zat gistermiddag op ‘e Veenhoop an een taofeltien tussen Douwe en Ynskje Hoekstra. Ynskje was tot veur een peer jaor beleidsmitwarker kultuur en arfgoed van de gemiente Smallingerlaand. Zi’j belde mi’j zes jaor leden om te vertellen dat ik de Rink van der Velde-pries wunnen hadde! Dat was op vri’jdagaovend 18 september 2020. Ik was doe een midweke mit Jelle in een huus van vekaansiepark Carpe Diem in Groet. Een huus pal naost et park. Ik hebbe daor doe nog een flut peren mit wegneumen. Et staot me bi’j dawwe vri’jdagsaovens, onderweg naor huus, nog eten hebben in Harlingen. Doe ‘k  thuuskwam ston d’r op ‘e voicemail da’k een zekere Ynskje Hoekstra bellen mos. Dat dee ik en doe zee die aorige vrouw dat me de Rink van der Velde-pries toekend was veur mien roman Vroeger is veurgoed veurbi’j. Ik was daor ontzaggelik bliede mit. Ok al omdat ik een groot liefhebber bin van et wark van Rink van der Velde. Ik hebbe al zien boeken. Ik wete nog da’k Jelle doe drekt beld hebbe. Mar ja, et was coronatied. De pries kon veureerst niet uutreikt wodden. Dat gebeurde eerst op 14 juli 2021 en doe mochten d’r nog mar een stokmennig meensken bi’j wezen. Dan was et gistermiddag gezelliger mit een zael vol volk. Mar toch… Et belangriekste is dat mi’j die pries ok een keer toekend wodde! Et vul me trouwens op dat ik daor gistermiddag de ienige eerdere prieswinner was. Dat vun ik toch wel wat schaemelties.
Ik hebbe vandemiddag Berkoop en De Hoeve even ommefietst. Ik moet d’r dit weekaende en maendag nog van profiteren. Daornao wodt et weer een stok minder mooi. D’r ston vandaege trouwens wel een best stok wiend.

In pattie streken van Nedersaksisch Nederlaand is meert de streektaelmaond. Dan wodt d’r extra andacht an de streektael besteded. In Drenthe is dat in ieder geval zo. Jelle en Gerda weren vandeweke in Dornumersiel in et noorden van Duutslaand. Ze stuurden me onderstaonde foto toe. Daor is september dus de streektaelmaond en d’r wodt zo te zien flink reklame veur maekt. Dit soort bodden he’k hier nog nooit zien. We kun nog wat leren van de Platduutspraoters!