Streektaeldiner

D’r dwarrelde vandaege een citroenvlinder deur de tuun. De eerste vlinder van dit jaor! En de toverhaezelneutepolle bluuit! Et is heerlik veurjaorsweer. Anke het de boel schonemaekt en ik hebbe op ‘e ni’je fiets naor Berkoop en Wolvege west. Daornao he’k een allemachtig grote flut stamppot wottels/siepels klaormaekt veur morgenaovend. Een hiel regiment soldaoten kan him d’r wel zat an eten.

Ik zal aanst tegen half zesse al in Willemsoord wezen Daor is in resteraant De Stien een Stellingwarver streektaeldiner. Alles is volboekt, dat d’r kommen zestig eters. Nao et veurgerecht vertelt Abel Darwinkel over et Stellingwarfs en de Stellingwarver Schrieversronte. Tussen et heufdgerecht en de naospieze vertel ik ien of twie verhaelen. Nao de naospieze zingt Lammy Bruyns Stellingwarver lieties. Et kan zodoende wel es een mooie aovend wodden. Et is de bedoeling dat et om kwat veur negen oflopen is.

Gister kwam d’r een kaorte van Harry. Die was naor de Jan Mankes-tentoonstelling west in Museum Belvédère. Hieronder Putters in de avondschemering uut 1912. Ik gao zeker ok nog naor disse tentoonstelling toe. Mar es zien… Et is een betien vusen te drok de laeste tied.