Streektael

Gister kree’k Folkert Heida uut Beilen en van vroeger uut Ni’jhooltpae an de deure. Hi’j brocht me een artikel uut et Dagblad van et Noorden van 13 juli en docht dat me dat wel interesseren zol. Dat was inderdaod et geval. Et was een interview mit schriever Chris Canter naor anleiding van et uutkommen van zien dichtbundel Hieltied onbekender. Ik was een schoffien leden bi’j de prissentaosie in et Huus van de Taol in Beilen en hebbe me de dichtbundel doe anschaft. Ik hebbe de gedichten intied ok lezen. Hiele mooie gedichten. Zo zol ik et niet kunnen. D’r staon ok vertaelings in vanuut et Engels in et Drents. Chris vertaelde o.e. The Raven van Edgar Allan Poe. Ik moet de bundel nog es weer lezen. Boven et interview staot as kop De streektaal hef al haost gien heden meer. Dat zegt en vint Chris. De streektael het dus al hielemaole gien toekomst meer. In et interview dat René Koster laestdaegs mit mi’j had het veur de radio heb ik zegd da’k in een starvende tael schrieve. Een bekende Friese schriever mailde me: Wy stjerre in bytsje mei dy taal mei. Lao’we zolange as d’r nog streektaelen binnen d’r mar fleurig van genieten.