Straandkuier

Et was straolend weer vandaege, lichtkaans een tikkeltien te fris veur een fietstocht, mar geweldig mooi veur een straandkuier. We bin dus naor Callaansoge west. Eerst hewwe daor in brasserie Brasil waarme poeiermelk had mit een hiempe waarm appelgebak. En doe hewwe dus een heerlike straandkuier van zoe’n vuuf kilemeter maekt. Heerlik! Ik vien de zee toch zo prachtig! De hoogmoedige meensken daenken dat ze schepper en schriever binnen in disse wereld. Vergeet et mar. Dat is de netuur. En et waeter van de zee komt staorigan almar hoger.te staon as straf veur et graoperige meensdom. De zunne braande oons tiedens die kuier in ’t gezichte. Et was d’r drok mit kuierders en de terrassen zatten vol. In straandpaviljoen De Toko hewwe op et terras nog wat dronken. D’r laggen twie honnen naost oons die graeg aaid wodden wollen. Dat hewwe dus daon. De jonge die daor bediende leup mit blote aarms en bienen. Dat was oons bi’j dattien graoden krek wat te gottig. Mar zokke jongkerels hebben nog hiet bloed, dat bekomt nao verloop van tied vanzels. Bi’j bakker Van der Ploeg he’k zoas gebrukelik wat kocht. Disse keer een sukerbolle en zes krentepoffen mit braandnettels d’r deur. Ik moet daor altied daenken an dokter Van der Ploeg en die zien assistente Mien Dobbelstien. We hebben vanaovend waarm eten had in hotel De Wijnberg/De Wienbarg in Bolsward. We vunnen et vleis daor wat an de taoie kaant. Mar wat was et een mooie dag! Hieronder een foto die ‘k vandaege maekt hebbe. Gezicht op Callaansoge.