Straandkuier

Et was gien fiets- en ok gien bootweer, mar we bin d’r wel een lange dag op uut west. We bin eerst naor Opperdoes west, naor een eerpelboer daor we wel vaeker kommen. We hebben d’r een peer poeden Ronde Opperdoezen kocht. In de loods van de man hongen metershoge foto’s van himzels, fleurig in gesprek mit Willem-Alexander en Máxima. Die bekeken in 2018 zien bedrief. Van daor biwwe naor Callaansoge gaon. Daor hewwe in oons vaaste resteraant Brasil waarme poeiermelk mit een hiempien appelgebak had. Dat kostte meer as 20 euro. Dat is rejaol meer as 40 gulden… Tsja… Vervolgens hewwe een lange straandkuier maekt. We hadden een lange broek en een trui mit jasse an. Et was an zee mar een graod of veertien, mar de zunne was d’r volop bi’j. Dat et was een heerlike kuier. D’r leupen trouwens ok meensken mit blote bienen en aarms, mar die zal et d’r naor vergaon. Die kriegen ongetwiefeld de koolde pip en blaosontsteking. Et was vloed, slim hoog waeter. We hadden dat nog nooit zo zien. De stormbrekers van besaltblokken weren nargens meer te zien. Et kan ok wezen dat de ieskappen van zuud- en noordpool nog hadder an ’t smulten binnen. In de veerte veerden schippen. D’r weren een protte meensken mit honnen die mit ballen in de bek maltaepelig henne-en-weer steuven. Dat is een mooi gezicht. Ik hebbe zoas gebrukelik bi’j bakker Van der Ploeg wat lekkers kocht: een sukerbolle en zes grote krentepoffen. Onderwegens naor huus toe hewwe eten in Viscenter ’t Wad in Den Oever. Ik hebbe heerlike scholfilet mit petat had. Hieronder nog twie foto’s die ‘k vandaege maekt hebbe. Gezicht op et dörpscentrum en et karkien van Callaansoge.