Stormy weather

Ik was nog mar krek thuus uut Berkoop en et wodde alderheiselikst mal weer. Hadde wiend en een bratse regen. En dat malle weer is nog altied gaonde. Ik mos drekt daenken an dat beroemde lietien Stormy weather. Een lietien uut 1933 dat deur beroemde artiesten zongen wodde: Frank Sinatra, Billie Holiday, Judy Garland. Et was vandemiddag prachtig en waarm weer in Berkoop en et was drok. Gister he’k best verkocht en vandaege nog veur 55 centen meer. Now de laeste dag nog! Et was aorig dat Peter en Janneke uut Burgum even langeskwammen en Sietske. Een peer daegen leden slingerde ik an de praot mit een man en dat bleek de breur van de Twentse schriever Gerrit Klaassen uut Goor te wezen. Haarm, Gé en ik bin vleden jaor nog bi’j Gerrit op vesite west. En zo is de wereld mar klein.

Hieronder een foto die ‘k van ’t veurjaor maekt hebbe doe d’r nog gien blad an de bomen zat. Dit is et gebouw van de Stellingwarver Schrieversronte daor vroeger de Veurschotbaank in zat. Et is morgen de laeste keer da’k daor tiedens Eupen Stal boeken verkopen zal. De Schrieversronte verhuust naor een gebouw, een goeie honderd meter veerderop an dezelde straote. Mar ik slute daor morgen veur mien gevuul wel wat of. In de hal zit een zwatte stien daor op te lezen is: Eerste steen gelegd door den heer Epke Willinge Prins. Van de oprichting af voorzitter dezer bank. 16 mei 1938. Ik mag hopen dat die stien beweerd blift.