Storm rond het landhuis

Ik hebbe vandaege meerdere keren butendeure ommelopen mit de vraoge: za’k fietsen gaon of niet? Ik hebbe et niet daon, vun dat d’r toch nog een koolde wiend ston. Misschien morgen of overmorgen… Dat daoromme bin ‘k mar wat mit twie kollums doende west. De iene zit al in de komputer, de aandere moet nog veerder uutwarkt wodden. Ik hebbe veur mezels al een betien beslist wanneer a’k mit et kollums schrieven veur de kraante stoppen zal. Ik hebbe vandaege ok lezen…

Eregister schreef ik da’k Het Landhuis van de Duutse bestsellerauteur Anne Jacobs lezen hadde. Ik hebbe drekt et vervolg Storm rond het landhuis ok in iene goeze uutlezen. Baronesse Franziska gaot nao et eupengaon van de Berliense Mure weeromme naor heur femilielaandgoed Dranitz in Mecklenburg-Vorpommern. Et is in de DDR-tied hielemaole verrinneweerd. Ze lat et opknappen, mar dat kost aorig meer centen as ze docht hadde. Ze wodt hulpen deur heur kleindochter Jenny die een dochtertien het van heur vroegere warkgever Simon Strassner. Dat is een gemiene gloeperd die stiekem perbeert alderhaande stokken grond van et laandgoed in zien bezit te kriegen. Gelokkig deurzien ze die aekelike kerel mit zien gladde en mooie praoties. Jenny begint Ulli de hieltied aoriger te vienen en dat is aandersomme ok zo. Franziska trouwt asnog, nao al die jaoren, mit heur jeugdliefde Walter. En now et dadde en laeste diel nog. Et komt allemaole grif goed!