Stoere fietsers

Gisteraovend he’k een schoffien mit Piet praot, die leup mit de beide honties de diek langes en kwam even an. Hi’j hadde lezen da’k an ’t brummelplokken west hedde, dat ik moch wel op heur laand zuken, naost en aachter heur huus naor de Scheene op. Dat he’k vandemiddag dus daon. Ik hebbe een mooi fluttien plokt en bi’j Piet, Bert en Immie theedronken en we hebben uutvoerig bi’jpraot. Krek as ik hebben Bert en Piet altied in Ni’jhooltpae woond. Lichtkaans dat d’r nog een peer binnen, mar vule niet. Misschien moe’n we mar een al of niet geheim genootschop oprichten van echte Ni’jhooltpaeïngers. Ik hebbe heur prachtige tuun bewonderd. Die kan wel in een tiedschrift. En ik hebbe de katten en de ara van Piet en Immie ok bewonderd. Ik hebbe ok wat mooi kleurde veren van de voegel mitkregen. Doe ‘k weer thuus was,  bin ‘k drekt weer an ’t brummelzuken gaon bi’j mi’j bi’j de Scheene langes naor mien oolde huus toe. Daor he’k een beste bratse plokt en die za’k vanaovend allemaole nog verwarken. Om zes ure vanaovend was et aende van Eupen Stal. Daor hadde ik vanzels bi’j wezen moeten. Mar op dat stuit was ik nog an ’t brummelplokken. Ik schaeme me wel wat da’k ze drie jaor aachter mekaander zitten laoten hebbe deurda’k naor et ziekenhuus mos. Ankem jaor moet de volgende generaosie et mar overnemen.

Eerder op ‘e middag ha’k al twie stoere fietsers welkom hieten in mien mooie dörp. Kammeraod Jelle uut Sneek en zien zeune Dirk maeken ieder jaor tegere een fietstocht. Van ’t jaor kwammen ze dus deur Ni’jhooltpae. Dat moet dus wel een prachtige tocht west hebben. As et snikhiete west was, ha’k heur mit een peer statpannegies waeter de huud nat gooid en heur elk een spoonze in de nekke uutdrokt. Dat doen ze bi’j de hadfietsers van de Ronde van Frankriek ok. Mar dat hoefde niet. Et was mooi fietsweer, mar niet snikhiete. Ik hebbe wel foto’s van heur maekt. Hieronder kommen ze in een stevig tempo over de Karkelaene op mi’j an. Ze hadden de vaort d’r best in. Ik fietse liever wat rustiger. Mar aj’ een jonge kerel bi’j je hebben moej’ broekzetten.