Stiekm trots!

Vandemiddag he’k weer naor Marian west veur fysio. Over twie weken za’k d’r weer henne, ankem weke is ze d’r niet. In de winkelstraote van Wolvege is et ien en al vrotteri’je. Ik zag wethoolder Hoen d’r bi’j staon. Et geft me een geruststellend gevuulte a’k zie dat de top van de gemiente de boel goed in de gaten hoolt en veurkomt dat d’r brieke ongelokken gebeuren.

Een peer weken leden kwam de eerste West-Stellingwarver glossy Stiekm trots uut in een oplaoge van 25.000 exemplaoren die overal huus an huus bezorgd wodden. Mar hier bi’j mi’j dus niet, hier is bliekber gieniene die de boel rondbrengen wil. Ik zag et tiedschrift vleden weke liggen in et resteraant bi’j de Driewegsluus en kon zo iene vergees mitnemen. Et blad zicht d’r prachtig uut. D’r staot een interview mit mi’j in van Magda Dullemond mit hiele mooie foto’s d’r bi’j. Rietvlechter Henk Diever uut Noordwoolde staot d’r ok in en et netuurparrediesien van Ruurd Jelle van der Leij in Hooltpae ok. Slimme aorig is et artikel over filmmaeker Steven de Jong die de karke van Hooltwoolde kocht het. Veerder een artikel over et Verona van West-Stellingwarf en mooie kuier- en fietstochten diej’  hier maeken kunnen. En ok nog wat hier vandezoemer allegeer te doen is. Neem d’r iene mit aj’ ze argens liggen zien!