Stemmen

Doe ‘k gisteraovend op bedde zol was poes mit een levendige moes in de hal. Ik bin d’r al hielemaole op ofjacht. Ik hebbe de katte grepen en die in de kaemer laoten en doe he’k de veurdeure loszet en de moes is et huus uutlopen. Hoevaeke zo’k dit soort aeventuren nog mitmaeken moeten?

Vandemorgen he’k henne te stemmen west veur de Europese verkiezings. Dit was de 55^ste keer da’k stemmen moch. De eerste keer was in 1970 veur de Perveensiaole Staoten. Ik hebbe nooit ok mar iene keer mist. Stemmen zie ik as een burgerplicht. Aj’ niet stemmen moej’ ok niet mierken as de dingen niet gaon zoas ie dat graeg willen. Jarmo zien moeder zag d’r vandemorgen streng op toe a’k et formelier wel in de busse glieden leut. Wat aorig dat zi’j vandaege in Ni’jhooltpae zat!

Et is vekaansietied. Harry en Frans zitten/zatten in Limburg. Ik kreeg een appien mit foto van heur en de groeten uut et plakkien Heel. Dat ligt vlakbi’j et witte stattien Thorn daor a’k in een veer verleden al es mit Jelle west hebbe.