Stemmen

Ik hebbe vandaege veur de 56^ste keer stemd. Nooit he’k ok mar iene keer oversleugen. Stemmen meugen is een groot demekraotisch recht. Wie niet henne gaot te stemmen, moet ok niet mierken. Mien eerste keer was bi’j de Staoteverkiezings van 1970. Ik hebbe vandaege op een perti’j stemd waor a’k mar vier keer eerder op stemd hebbe. De veurige keer was bi’j de gemienteraodsverkiezings van 2018. En now mar hopen dat mien stemme helpt.

Gister kree ‘k et oktobernommer van et Stellingwarver tiedschrift De Ovend over de heerd en dat he’k vandaege lezen. Abel Darwinkel bestedet andacht an de film die Steven de Jong van mien verhael Sultan maeken wil. Abel ropt meensken op om heur op te geven as ze mitspeulen willen in de film. Dat doe ik hier ok nog een keer. Meensken die wat tenielervering hebben en goed Stellingwarfs praoten kunnen kun heur opgeven. Alleman kan dat doen. De heufdrollen bin veur twie vrouwluden en een man van om de zeuventig henne en een vrouw van om de veertig. Meensken die heur opgeven kriegen van Steven de Jong een masterclass filmakteren in de filmkarke in Hooltwoolde. Een geweldige ervering! Stuur een mailtien naor info@filmkerkwolvega.nl