Stellingwarver Verhaeleaovend

Ik was gisteraovend een betien bange da’k mien stemme kwietraeken zol omda’k weer zo dikke verkolen bin. Mar et vertellen op ‘e Stellingwarver Verhaeleaovend 2026 in Museum ’t Kiekhuus van Roelof en Sjoukje Bakker in Wolvege is goed verlopen. De tekst zat d’r goed in, ik bin nargens haoken en stoeken bleven. Ik hebbe drie keer et verhael De vrouw van de burgemeester veur drie keer een aandere groep van ongeveer zeuventien meensken verteld. De aovend was uutverkocht. Ik moch in iene ruumte optreden mit Alie Stroeve. Dat vrommes is ommeraek in ’t zoolt bebeten. Ze zat veertig jaor bi’j et beroemde kabberetgezelschop Twie recht, twie averecht uut Willemsoord e.o. Alie en ik deden alles uut et heufd. Veerder warkten mit: Harmen Houtman en Grietje Dijkstra. En: Roelof Bakker, de man van et museum die ok in et Stellingwarfs schrift, en Menno Dolstra. Menno is een jongkerel van in de dattig die in Noordwoolde woont. Et is tegenwoordig al haost biezunder dat goenend van die leeftied nog Stellingwarfs praoten. Mar hi’j schrift gedichten en limericks in et Stellingwarfs. In et boek Fier dyn eigen taal, dat lessend uutkwam, is een gedicht van him opneumen. De meensken die in et Stellingwarfs schrieven beginnen staorigan verhipte oolde koppen te kriegen. Menno is zodoende de Stellingwarver Hope in Bange Daegen! Lenus van der Broek maekte gisteraovend foto’s. Boven: hier bin ik an et woord. Onder: hier is Alie an et vertellen.