Stellingwarver poëzie

Vandaege veur twie weken kwammen d’r twie bundels mit Stellingwarver gedichten uut. Die middag, in et gebouw van de Stellingwarver Schrieversronte in Berkoop, kwam ok de cd Onderwegens van Karst Berkenbosch en Mark Verbeek uut. D’r kon ofscheid neumen wodden van Abel Darwinkel as direkteur van de Stellingwarver Schrieversronte en ie konnen in de kunde kommen mit Arjan Sterken as ni’je direkteur. Butendat wodde d’r andacht vraogd om meer vri’jwilligers veur de Schrieversronte. Daor is slim verlet van. As d’r zovule dingen in iene middag stopt wodden, krigt alles zien gerak dan wel goed? Kommen d’r now echt meer vri’jwilligers bi’j? De beide boeken mit gedichten hadden ok wel wat meer ruumte en andacht verdiend. Ze hadden bi’jveurbeeld uutkommen kund op een middag of aovend mit Stellingwarver poëzie. Misschien hadde d’r een Friese dichter bi’jvraogd wodden kund. Edwin de Groot is een bekende Friese dichter mit Stellingwarver oolden. Of de bekende Drentse dichteresse Suze Sanders. Zol daor gien belangstelling veur west hebben? En dan hadden die beide boeken dan ok uutkommen kund.
Dat eerste boek was d’r trouwens al even. De dichtbundel Tegere van Roely Bakker en Harmen Houtman. Ze bin beidend in staot en schrief mooie gedichten. Ik hadde de bundel dus al lezen. Eerst docht ik nog even: wat wonderlik, ze schrieven over dezelde onderwarpen. Mar dat was dus juust de opzet. Ze hebben een stokmennig onderwarpen uutkeuzen en bin daor beidend gedichten over schrieven gaon. Harmen in et Stellingwarfs van Ni’jhooltpae en Roely in et Stellingwarfs van Iesvene in de gemiente Stienwiekerlaand. Et is mooi om dat naost mekeer te zien. Sijtze Veldema het et boek, in een had kaft, prachtig vormgeven. Dat is him wel toevertrouwd. Mar… ik hadde de titel toch et liefste as ien woord op ‘e veurkaant van et boek had. Moet et de koper niet wat makkelik maekt wodden in dit opzicht? Of moet de koper juust ni’jsgierig maekt wodden? Lees disse bundel en lees dat mooie gedicht Die lange gang… van Harmen. Die lange gang is de gang in de oolde schoele van Ni’jhooltpae.
D’r verscheen ok een boek mit vuuf literaire fietstochten deur de Stellingwarven: Et pad van de griffioen. Et boek wodde saemensteld deur Christine Mulder. Ik hebbe et boek mit alle routes lezen. In de Stellingwarfstaelige tekst kuj’ tiedens die vuuf routes deur de Stellingwarven op verschillende plakken Stellingwarver gedichten tegenkommen die op die plakken betrekking hebben of daor ok in et echt te zien en te lezen binnen. Van mar liefst 17 dichters uut heden en verleden is wark opneumen. Ik zal de routes niet fietsen, want ik kenne ze wel deur al mien fietseri’je. De gedichten ken ik ok wel. Mar dit boek heurt behalven in boekwinkels aenlik ok te koop te wezen bi’j toeristische infopunten, campings en hotels in de buurt. Of hebben die heur eigen fietsroutes te koop?