Stellingwarver in de vremde

Et is een betien te drok en dan vergeet ie dingen. Doe ‘k vandemorgen in Wolvege bi’j fysiosport kwam, dee blieken da’k de sleutel van de toestellen vergeten hadde. Dus weer in de auto naor huus om dat ding op te haelen en doe weer naor Wolvege. Nao fysiosport bin ‘k naor Jarmo gaon om een bakkien drinken en een flinke hiempe gebak. Hi’j is vandaege 26 jaor wodden! Doe ‘k twienenhalf jaor leden mit him in de kunde kwam was et nog mar zoe’n jonge. En now is hi’j ondernemer mit een eigen bedrief. Een hiele meneer! In de supermark klopte me een man even laeter vrundschoppelik op ‘e schoolder. Ik hadde gien flauw idee wie dat was… Ik praote ok geregeld mit meensken en dan he’k ok gien idee wie as et binnen.

Een peer daegen leden kree’k een mailtien van Monique uut Sneek. Ze wollen heur vader graeg mien laeste boek Naozoemerlaand geven. Heur vader, Piet Scheer, kwam van oorsprong van Wolvege en woont now in Baarn. Een Stellingwarver in de vremde dus. Zien vrouw is vleden jaor uut de tied raekt en now kan hi’j daor tegen gieniene meer Stellingwarfs praoten. Dat vuult as een gemis. Vandemiddag kwam hi’j mit zien dochter Saskia, die in Renkum woont, in de auto onderweg naor Sneek bi’j me an. We hebben hiel gezellig een schoffien praot. In et Stellingwarfs! En doe bin ze mit et boek weer in de auto stapt. Stellingwarfs lezen kuj’ gelokkig overal. Ik heure et trouwens wel vaeker de laeste tied dat meensken et Stellingwarfs praoten zo missen in de vremde as heur naosten wegraekt binnen. Ik wete dat ok van een man in Amersfoort en een vrouw in Almelo. Zovule kan een tael veur een meenske betekenen!

En doe kreeg ik nog een man van de Nedersaksische uutgeveri’je (a’k et goed begrepen hebbe) an de tillefoon. Ze zuken een vertaeler van Asterix in et Stellingwarfs. Daor begin ik niet an, ik hebbe werachtig wark en drokte zat. Ik hebbe him wat naemen geven van meensken die wel vertaelen kunnen.