Stellingwarver audiotoer prissenteerd

Vandemorgen is in et Nationaol Vlechtmuseum in Noordwoolde de Stellingwarfstaelige audiotoer van et museum prissenteerd. Ik hebbe een schoffien leden al weer de Nederlaanstaelige audiotoer vertaeld in et Stellingwarfs en hebbe de tekst ok inspreuken. Dat de meensken kun now mit mien stemme deur et museum kuieren en alles rustig bekieken. Alle taelen, groot en klein, bin vanzels lieke vule weerd. Et is dan ok logisch dat een museum in de Stellingwarven ok een audiotoer in et Stellingwarfs het. Dat et Vlechtmuseum hier ok echt wark van maekt het, is hiel mooi! De direkteur van et museum, Iwan van Nieuwenhoven, hiette oons welkom mit wat drinken en een vulde koeke. Ik was d’r dus niet allienig. Abel Darwinkel, de direkteur van de Stellingwarver Schrieversronte, en Harry Komduur, de veurzitter van DAN (Dorpsarchief Noordwoolde) weren d’r ok bi’j. Iwan het foto’s maekt en een artikel veur de kraanten. Hieronder een foto die deur Iwan in et museum maekt is. Van links naor rechts: Johan, Harry en Abel. Vandemiddag he’k op ‘e fiets naor de Eupen Stal west. D’r kwam mar hiel weinig volk, dat d’r is dus ok mar hiel weinig verkocht. Morgen beter, mar dan heb ik een vri’je dag!