Stellingwarver Aovend

Wat heb ik een hekel an dit wienderige haastweer. Krastes nog an toe. Ik wil gewoon mit mooi weer in de kotte broek op ‘e fiets de diek uut! En dan die kotter woddende daegen… Mit et jaor krie ‘k daor een grotere hekel an. Ik hebbe een kollum in klad schreven en warke et stokkien laeter wel uut. Butendat he’k een citroen mascarpone keek bakt en ik hebbe een grune kool, die ‘k gister van Anke kreeg, in stokkies sneden en in de vriezer drokt. Ik hebbe nog nooit grune kool had.

Ik hebbe vandaege ok de verhaelen rippeteerd die ‘k ankem weke woensdagaovend vertellen zal. Ik zal ze de kommende daegen nog vaeker rippeteren. Woensdagaovend is d’r in et kader van Wolvege Bluuit een Stellingwarver Aovend in et Theater op de Hoogte oftewel de Karke op ‘e Hoogte. Zie de ankondiging hieronder. Ie kun d’r vergees henne, mar ie moe’n je wel even anmelden. De inloop is om half achte, et pergramme begint om acht ure. D’r zal wat verteld wodden over et meer zichtber maeken van et Stellingwarfs. Harmen Houtman zal gedichten veurlezen van himzels en van Roely Bakker uut heur ni’je bundel Tegere, Karst Berkenbosch en Mark Verbeek speulen en zingen lieties van heur ni’je cd Onderwegens. En Johan Veenstra, dat bin ik dus, vertelt verhaelen. Ik vertelle netuurlik nog een keer et verhael Sultan uut mien boek Naozoemerlaand dat verfimd wodden zal deur Steven de Jong. Misschien bin d’r woensdagaovend wel meensken die mitspeulen willen in de film en auditie doen willen. D’r staot ok een boeketaofel daor aj’ de boeken en cd’s kopen kunnen.