Stellingwarfs in et gemientehuus

D’r is niet vaeke Stellingwarfs te heuren tiedens de raodsvergeerderings in et gemientehuus in Wolvege, mar laestdaegs was et raek! En goed raek ok! Omdat daor niks van in de Stellingwarf staon het, vertel ik et hier mar. Burgemeester André van de Nadort wodde op maendagaovend 4 september weer benuumd om nog es zes jaor burgemeester van West-Stellingwarf te wezen. Plakvervangend raodsveurzitter was die aovend Ton Mulder van Blijf Stellingwarfs. Ton was van doel en doe die aovend alles in et Stellingwarfs en hi’j vreug mi’j as ik wat hi’j zeggen zol wel in goed en geef Stellingwarfs opschrieven wol. Mar… doe kwam ik in et ziekenhuus te lane en het Sietske Bloemhoff dat klussien van me overneumen. En zo dee Ton zien toespraoke in et Stellingwarfs en praotte hi’j die aovend in et Stellingwarfs an mekaander. Behalven burgemeester, raodsleden en wethoolders was de Kommesaores van de Keuning, Arno Brok, d’r. Hi’j nam de burgemeester de eed of. Alle dippeteerden weren trouwens ok naor Wolvege ofreisd. Ton Mulder kreeg nao ofloop een protte komplementen veur zien prissentaosie en de Kommesaores stelde et ok slim op pries dat et Stellingwarfs die aovend bruukt wodde. Dat was dus mooi wat reklame veur oonze tael! Ton Mulder verdient een grote toefte veren op zien daenkbeeldige hoed!

Now we et toch over et Stellingwarfs hebben… Hebben jim de petitie veur et Nedersaksisch en et Limburgs al tekend? Nee? Wel doen! Niet sloeren laoten! Zie http://erkenregiotalen.petities.nl