Stellingwarfs in Amersfoort

Vandemorgen om kwat over negen bin ‘k bi’j Marjan in de auto stapt en we bin naor Amersfoort reden. Op vesite bi’j Sipke Leemans. Dat is een aachterneve van Marjan. Ik bin ok een aachterneve van Marjan, mar ik bin gien femilie van Sipke. Sipke zien moeder, Neeltien, was een zuster van een zwaoger van mien moeder. Sipke is mit zien oolden en breurs en zusters as veertienjaorige jonge van Berkoop naor Den Haag verhuusd. Ik kwam daor as jonge van zeuventien al mit kammeraod Jan Menger bi’j Neeltien. We kwammen doe ok wel bi’j Sipke en Gerda en heur nog jonge kiender. Sipke was doe een jonge kerel van 31 jaor. Now is hi’j 94 en hi’j was gister nog even op ‘e fiets naor ien van zien dochters west die vlakbi’j him in Amersfoort woont. Ik moch willen da’k him dat over veertien jaor nog naodoen kon. Op 7 feberwaori 2004 moch ik in Hooglaand optreden veur de Fryske Krite. Daor weren Sipke en Gerda doe ok en Omroep Frieslaand maekte opnaemen veur een tillevisiedokumentaire over me. Ze bin in Den Haag onder mekeer altied Stellingwarfs praoten bleven, mar now is Sipke de ienigste die nog leeft. Hi’j kan zodoende mit gien meens meer Stellingwarfs praoten en dat mist hi’j zo. Zovule kan een tael veur een meens betekenen. Mar wi’j hebben vandaege hiel gezellig mit ’n drienend Stellingwarfs praot in Amersfoort!