Johan Veenstra
Stellingwarver schriever en verteller
Plaetst op 25 jannewaori 2025.
Ik hebbe vandaege een heerlike ontbijtkoeke bakt. Eregister ha’k een al lieke lekkere boerekeek mit Fraanse vruchies d’r deur bakt. Ik bin dus weer drok an de bakkeri’je. Ik hebbe vandaege ok nog een kollum veur de kraante schreven en wat laeter he’k die flink befiekt en doe opsleugen in de komputer. De titel is Stellingwarf first! Waor disse kollum over gaot? Ik neme an dat de goeie verstaonder an een half woord genoeg het.
De eerste weke van juli bin ‘k van de polle. Jelle en ik gaon dan een midweke op vekaansie in etzelde husien in Lochem as waor we vleden jaor ok inzeten hebben. Doe sprongen de iekhoorns om de deure henne, ik mag hopen dat dat now weer et geval wezen zal. We hebben vleden jaor gien mooi weer had en konnen mar iene dag uut fietsen in die prachtige omgeving. We hebben doe de Achtkesteletocht van Vorden fietst en veerder hewwe kesteel Ruurlo en een museum in Gorssel bekeken. We hopen now op echt mooi weer en dawwe daor dan elke dag uut fietsen kunnen.