Steggerde

Gisteraovend moch ik vertellen veur de leden van et katteliek vrouwludenetwark Zij actief. Et was in zael De Landerije in Steggerde en d’r weren ongeveer 40 vrouwluden. Et was een mooie aovend en we kregen ok nog lekkere happies. Et vertelseizoen is haost veurbi’j, mar ik zal zaoterdagmiddag nog naor Liwwadden. Tegere mit de Friese zangeresse Grytsje Kingma mag ik dan een middag verzorgen in de Kurioskarke.

Vandemorgen he’k de boeken weeromme naor de Schrieversronte in Berkoop brocht die ‘k vleden zaoterdag op ‘e hobbymark in Beetsterzwaog niet verkocht hadde. Vandemiddag he’k de kollum ofmaekt die ‘k gister al in klad schreven hadde. Veurzitter Harry Komduur van de DAN in Noordwoolde kwam langes mit de vraoge as ik et eerste exemplaor van een deur heur uut te geven boek in ontvangst nemen wil. Dat wil ik zeker wel en dat zal wezen op zundag 23 meert.

Ik hebbe de voegelties nog altied op et voer. D’r hong vandaege ok een protter an de vetballen. D’r hipte een mooie markloper deur de tuun en ik hadde een prachtige appelvinke bi’j de zunnebloemepitten. Wat is dat een mooi kleurd voegeltien en et puntien van de stat het hi’j wit. Ik hebbe een schoffien mit bewondering naor him staon te kieken.