Staringdag

We hebben gisteraovend lange butendeure zeten. Et was doodstille, allienig de voegelties kwinkeleerden dat et een lieve lust was. We bin in huus gaon doe de nefies lastig begonnen te wodden. Eerst nao middernaacht biwwe op bedde gaon, want ok nao 62 jaor vrundschop hewwe nog een protte te bepraoten.

Omdat et een smoorhiete dag wodden zol, et wodde uuteindelik 36 graoden, was et gien fietsweer. We bin in de auto naor Almen reden veur een Staringdag. Almen ligt op ongeveer 10 kilemeter van Lochem en is vanzels wereldberoemd wodden deur et gedicht van Staring. De dichter en laandbouwkundige A.C.W. Staring (1767-1840) woonde op kesteel De Wildenborch in Vorden. Now woont daor nog altied een Staring! We hebben in Almen et Museum Staal bekeken mit de tentoonstelling Aan tafel. En veerder was d’r van alles over Staring te zien. Alles van de ulo kwam bi’j oons weer boven. De beroemde gedichten van Staring: Sikkels blinken, sikkels klinken, Bereisde Roel en vanzels De hoofdige boer. Dat laeste gedicht gaot over Almen. De beide beginregels bin: Elk weet, waar ’t Almensch Kerkje staat, En kent de laan, die derwaart gaat. En dan de laeste twie beroemde regels: Bouwt gij een brug om droog te gaan? Ik kom er ook, met laarzen aan! Nao et museum hewwe hiel toepasselik luncht op et terras van laandhotel De hoofdige boer. Ik hebbe een heerlik twaelfuurtien had mit wottelsoep. Nao et eten hewwe de karke uut et gedicht van binnen bekeken. En doe biwwe in Lochem weer naor de Albert Heijn west. We hebben now krek eten en gaon aanst weer butendeure zitten. Hieronder een foto die ‘k vandaege van ’t Almensch Kerkje maekt hebbe.