Stappest

We bin d’r nao een peer weken schoft in verbaand mit mien kwakkelderi’je vandaege weer op uut west. In Stappest hewwe Museum Staphorst bekeken. Ie kommen daor eerst in een mooie oolde boerderi’je daor de balie is en een grote ruumte daor aj’ wat drinken kunnen. We hebben elk een bakkien drinken had mit een lekker stokkien Stappester koeke d’r bi’j. In de al lieke mooie en oolde boerderi’je uut omstreeks 1840 die d’r aachter staot is et museum en dat is prachtig. Wat is alles goed onderhullen! Prachtige kaemers mit bedsteden, een kelder mit volle weckflessen… Waor vroeger de dele en de stallen weren kuj’ now genieten van alles waj’ d’r bekieken kunnen mit alderhaande filmpies d’r bi’j. Een zulversmid die een ooriezer an ’t maeken is. Netuurlik wodt d’r rejaol andacht besteded an de mooie klederdracht die daegeliks nog deur zoe’n vuufhonderd vrouwluden uut Stappest en Rouvene dreugen wodt. Sund 2017 bin d’r gien manluden meer die de oolde dracht dregen. Dat is jammer! D’r is een weveri’je en een stoffewinkel diej’ bekieken kunnen. Boven in de boerderi’je was een tentoonstelling over hooltimitaosie en dekeraosie. Hiel mooi! Butendeure was een vrouw ekkels bi’j mekeer an ’t gadderen. D’r bin van ’t jaor allemachtig vule ekkels. De oprit ligt hier ok vol. Dan komt d’r dus een strenge winter, zeden ze vroeger. De vrouw vertelde dat de ekkels naor een man in Duutslaand gaon. Wi’j zochten as kiender ok ekkels. Die wodden an de varkens opvoerd. Zollen de Stappester ekkels naor Duutse varkens gaon? De vrouw wus et niet. We hebben vanaovend lekker waarm eten had bi’j Van der Valk in Wolvege. Ik hadde in lange tied niet meer argens waarm eten had. Hopelik krie’k d’r gien miskommen van. Hieronder een foto die ‘k vandemiddag maekt hebbe van Museum Staphorst