Johan Veenstra
Stellingwarver schriever en verteller

Stamppotbuffet

Plaetst op 18 november 2022.

Vandemiddag he’k henne te bloedprikken west in Wolvege angaonde de bloedsuker. De uutslag was 4,8 en dat was goed, hebben ze me verteld. An et aende van de middag gao ‘k naor Fettje in Noordwoolde en die neem ik mit in de auto naor resteraant De Bosbarg in Appelsche. Daor is vanaovend een stamppotbuffet veur vri’jwilligers van de Stellingwarver Schrieversronte. En… ik bin daor veur de eerste keer veur uutneudigd. Dat ik zal me goed zat eten, dan he’k d’r ok wat an!
Hieronder nog een foto die ‘k gister maekt hebbe in Elburg bi’j de Zaandverhaelen. Dit is een zaandskulptuur van Adam en Eva, kompleet mit appels en slangen. Daor begon in wezen alle ellende mit. D’r naost was een zaandpetret van Kaïn en Abel, de zeunen van Adam en Eva. En Kaïn maekte Abel dood… Mit et meensdom zol et veerder niet echt wat wodden. Hebzucht en ofgeunst zollen de wereld beheersen. Ik daenke da’k daor morgen mar een kollum over schrieven moet.