Stad

We bin vandaege naor Stad west, oftewel Grunningen. We bin d’r in de mist henne reden. We weren daor al een jaormennig niet meer west en van alles was veraanderd wat de wegen anbelangt. De parkeergerage daor we aanders altied stonnen was dichte en wodt verbouwd. We bin op een groot parkeerterrein terechtekommen op een kertier lopen van et centrum. Mar och, we bin nog jong. We hebben in hiel wat winkels west mar weinig kocht. An de Grote Mark hewwe in een resteraant waarme poeiermelk en een gebakkien had. En daor kenden een peer vrouwluden me en ik kende heur. We hadden mekeer vleden zundag nog zien en mit mekeer praot in Linde. De bekende Drentse dichteressen Nicolette Leegstra en Suze Sanders (ps van Albertien Klunder-Hof). Ze hadden een vrouw uut Daolen bi’j heur en dat bleek een zuster van Francine Gramsma uut Oosterwoolde te wezen. Francine  ken ik van de Eupen Stal. Ze kwammen elke maond een keer mit ’n drienend bi’j mekaander, vertelden ze. We hebben genoeglik even praot. Weeromme naor huus toe was d’r gien mist meer. We hebben lekker eten in hotel-resteraant ’t Witte Huus in Donkerbroek. Ik hebbe heekfilet had. Hieronder een foto die ‘k vandaege maekt hebbe. Op ‘e Grote Mark bi’j de Oolde Grieze was kermis. Mar veur et goddelike kiend was niet iens een waarme stal. Et lag daor eupen en bloot in de koolde Grunninger dieze. En et leven zol toch al niet makkelik wodden. Aarm kiend…