STABIJ

Veur een romantikus zoas ik bin is The Notebook wel zoe’n betien et mooiste van et mooiste. Ik hebbe de roman van Nicholas Sparks indertied lezen en gisteraovend op België de film nog es weer zien. Veur de dadde of vierde keer of zo. Een prachtig romantisch drama: hatstochtelik, intiem en ontroerend. Een geweldig mooi liefdesverhael over Noah en Allie mit geweldige akteurs: Ryan Gosling, Rachel McAdams, James Garner en Gena Rowlands. Een ooldere man vertelt zien demente vrouw, die him niet meer kent, een verhael. Hi’j lest heur elke dag veur en zi’j gaot hielemaole in et verhael mit. Totdat ze an et aende inienend een helder ogenblik het en in de gaten krigt dat de verteller heur man Noah is en zi’j Allie. Dat et verhael over heur beidend en heur leven gaot. Ik hadde de traonen an et aende weer in de ogen.

Et mooie (kedo)boek(ien) STABIJ van kammeraod Douwe Kootstra (verhaelen, gedichten) en Tjibbe Hooghiemstra (tekenings) over Hooghiemstra zien hond Liv is een groot sukses. De eerste drok van de Friese versie was in een weekmennig uutverkocht. Binnenkot komt de twiede drok en de vertaeling in et Nederlaans. Vandemorgen weren de beide manluden en de hond te beluusteren in et pergramme Buro de Vries op Omroep Frieslaand. Douwe, Tjibbe en Liv gongen mit Simone Scheffer van de Omroep kuieren in Lieveren daor Tjibbe Hooghiemstra woont. En onderweg wodden we van alles geweer. Douwe, Tjibbe en Liv beginnen binnenkot mit de toernee Stabij on tour deur hiel Nederlaand. De oftrap is op 13 feberwaori in keunstgalerie Contempo in Rotterdam in et kader van Artweek Rotterdam. Deo en Corona Volente.