Sprookjesboek vol decemberzegels

Vandemorgen kon ik mien ni’je riebewies al van et gemientehuus haelen. Now kan ‘k weer vuuf jaor veuruut. Dat is een hiele tied en in die tied kan d’r een protte gebeuren. Mar ik bin bliede dat et now klaor is.

De ni’je decemberzegels bin d’r weer en die kuj’ now al bruken. Op ‘e zegels van dit jaor bin sprokies ofbeelded. Aj’ op zien minst twie vellegies bestellen/kopen kriej d’r een mooi boekien bi’j mit daor de sprokies in die op ‘e postzegels staon. Dat he’k dus drekt daon en vandemiddag kwam d’r een bussien langes mit mien pakkien. De jonge van dat bussien hul me een ding veur de neuze waor a’k mien haandtekening op zetten mos. Ik hebbe wel wat tegen him zegd, mar hi’j het gien ien stom woord tegen mi’j zegd. We gaon d’r mit mekaander niet echt op veuruut in de wereld.

Hieronder nog een foto van gister. Op et parkeerterrein van resteraant Waddengenot aan Zee in Lauwersoge, daor we lekker eten hebben, staon botties waor as gaasten van et resteraant de auto daelezetten kunnen. Dat gelt gelokkig niet allienig veur meensken, mar ok veur voegels!