Spek- en smooltbroggen

Gister schreef ik an et aende van mien dagboekstokkien over de kontakten die Haarm (Harmen Houtman) en ik in de negentiger jaoren mit twie bekende schrievers had hebben. Haarm mit Hans Warren en ikke mit Cees Nooteboom. Ik schreef ok dat daor lichtkaans wel een mooi verhael veur De Ovend inzitten zol. Aj’ zoks roepen moej’ et ok doen. Et was vandaege dus een schriefdag. Ik hebbe daor een artikel van zoe’n 1.100 woorden over schreven en et Haarm toemaild. Et aorige is dat de briefies die Warren en Nooteboom oons stuurd hebben allebeide beweerd bleven binnen. Dat now ja, de redaktie van De Ovend moet mar zeggen as ze dit hebben willen.

Om vuuf ure zat ik klaor veur de 500 meter hadrieden veur manluden. Dat gaot zo hadde en ik bin altied zo bange dat ze uut de bocht vliegen… Dat ik hole mezels stief an de stoel beet. Stolz het et verdikkeme krek weer wunnen van oonze Jenning de Boo. Zol die Amerikaan morgens misschien spek- en smooltbroggen kriegen? Ik daenke dat dat et verschil maekt, want we weten allemaole nog wel van vroeger daj’ daor ommeraek inhoolten van kriegen. Ik las vandaege trouwens dat de kondooms in et Olympische dörp al schone op binnen. En we bin nog mar halverwege. Hoe komt dit? Ze hadden omtrent tienduzend van die dingen insleugen. Ze hebben daor dus bliekber ok nog tied veur aandere aktiviteiten. Verhogen die aktiviteiten de sportieve prestaosies of juust niet? Is dat wel es onderzocht?

Eregister was mien fiets jaorig. Ik hebbe et karregien now een jaor en hebbe d’r in dat eerste jaor 2.552 kilemeter op reden. Dat is best wel vule veur mien doen. Veur aanderen is et vanzels niks, mien overbuurman ridt jaors zoe’n 6.000 kilemeter op zien fiets. Die zal ok wel spek- en smooltbroggen kriegen.