Spandoek

Vannaacht he’k ok weer goed slaopen in mien uutvanhuzersbedde. Ronald en Gré weren vandemorgen even veur negen ure weer thuus, we hebben nog even praot en ik hebbe ze nog es bedaankt da’k in heur B&B uutvanhuus kommen moch. En doe bin ‘k op ‘e fiets stapt en een peer menuten laeter wa’k thuus. Poes was bliede da’k d’r weer was! Ik hebbe vandemorgen de kollum die ‘k daor schreven hebbe uutwarkt en uuttikt. Laeter za’k d’r nog een wat langer verhael over schrieven.

Aj’ deur de winkelstraote van Wolvege lopen ziej’ overal vlaggies mit de griffioen en de tekst stiekm trots. We moe’n dus stiekem trots wezen op Wolvege, West-Stellingwarf en et Stellingwarfs ok, ma’k annemen. Op ‘e Hoeke, midden in Ni’jhooltpae hangt een groot spandoek mit de tekst stiekm teleurgesteld. Een protte meensken uut et dörp bin slim teleursteld in de gemiente. Zonder ok mar ienig overleg wo’n d’r 40 Oekraïnse vlochtelingen huusvest in de grote boerderi’je midden in et dörp daor vroeger Jan Eits en Piet Winia boerkten. De meensken bin niet tegen et opnemen van Oekraïners. Ze vienen 40 trouwens wel riekelik vule op een antal van 500 inwoners. Veerweg et slimste vienen ze dat alles zonder overleg gaon is. Alle dreegvlak, dat d’r echt wel was, is now in ienkeer vot. Tel uut je weenst. Vanaovend zal Plaetselik Belang gebruuk maeken van et recht om et woord te voeren veur et begin van de raodsvergeerdering. Dat zal ongetwiefeld niks uuthaelen, want zo te zien bin ze al mit de verbouwing in de boerderi’je uut aende zet.