Souvenirs

Gisteraovend he’k de film The Help nog es weer zien. Een prachtige film van zowat drie uren. Et speult in Mississippi, in de zestiger jaoren en gaot over de verholings tussen de witte baozen en heur zwatte dienstmaegies. Die maegies wo’n onmeenselik en onterend behaandeld. Mar dan kriegen ze hulpe van een witte journaliste. Wat een prachtig spel! Vandemorgen zat ik om kwat over achte al op ‘e fiets naor Wolvege. Ik doe mit dit mooie weer gien bosschoppen mit de auto, dat betekent da’k wat vaeker op ‘e fiets gao. Mar dat is grif slim gezond! Doe ‘k weer thuus was, he’k een superlekkere karremelkeek bakt van mael da’k kocht hebbe in Diepenheim doe we daor een schoffien leden een fietstocht maekten

Ik hebbe et boek Souvenirs van Ferry Zandvliet lezen. Die was mit drie kammeraoden op 13 november 2015 veur een konsert in et theater Bataclan in Peries. En doe begonnen drie manluden mit kalasjnikovs te schieten op ‘e meensken. Om him henne wodden d’r tientallen doodscheuten. Kroepende deur et bloed en over de lichems van aandere bezukers henne wus hi’j te ontkommen. Zien drie kammeraoden ok. Zandvliet vertelt over disse verschrikkelike gebeurtenis en wat dat veerder veur him betekend het. Niet warken kunnen, paniekanvallen, op bezuuk bi’j psychologen. Uuteindelik kwam hi’j weer uut de nederklits en hi’j praotte mit de vader van ien van de moordeners. Now kuj’  Zandvliet inhuren om d’r veur groepen volk over te vertellen. Wat et mit je doen kan as zoks je overkomt. Dat kost wel een cent of wat: tussen de 2.000 en 3.500 euro. Ik bin zo duur niet.