Sokken van Lies

Vandemorgen wa’k al veur negen ure in de karke van Scharpenzeel veur de jaorlikse kastmark. Ik was d’r vleden jaor ok west en dat het doe goed voldaon. Et was mooi dat de Pieter Stoevezaandweg weer eupen was. Die weg het d’r een hiel schoft uutlegen en dat was lastig. D’r kwam vandaege beheurlik wat volk naor de mark. Et was slimme gezellig. De ontvangst was daor weer geweldig hattelik. We konnen iederkeer drinken (thee en koffie) kriegen en tussen de middag een kop snet mit gelderse wost d’r in. Heerlik! Ik hebbe vandaege best verkocht! En… ik wodde vaeke fielseteerd vanwege mien ereburgerschop. Ik ston krek as vleden jaor naost Lies. We stonnen tegere onder et orgel en dat was vandemorgen ok even te heuren. Dat klonk mooi in de versierde karke. Ik kenne Lies al jaoren van dit soort marken. Op ‘e Wintermark in Mildam hewwe ok meerdere keren naost mekeer staon in de grote zael van Hof van Schoterlaand. Lies woont trouwens tegenover de karke in Scharpenzeel. Ze het o.e. deur heurzels breide sokken te koop. Ik hebbe vanzels ok een peer van heur kocht en ze daor drekt past. Sokken van Lies veur elke pries! Hieronder dan nog een foto die gister in et gemientehuus maekt is deur Lenus van der Broek. Hier bekiek ik de penning mit et gemientewaopen die ‘k krek van de burgemeester kregen hebbe.