Sni’jschoeven

Eerst nog even over gister… Ik hebbe goed slaopen in Goes. We hebben laete broodeten en bin doe de stad nog in west. Ik hebbe daor een truigien en een bi’jpassend overhemd kocht. We hebben op een verwaarmd terras an de Grote Mark om kwat over twieje luncht. Ik hebbe een lekkere tosti had. Op ‘e foto hieronder hebben Roelien en Ronny de menukaorte d’r bi’j. Doe we daor zatten kreeg Goes een enorme haegelbujje te verwarken. Et was d’r donker van. Mar… wat is zoe’n verwaarmd terras aenlik een gekkeboel. Wat een geldvergriemeri’je. D’r wodt oons zo veurhullen dawwe zunig wezen moeten mit energie! Om kwat veur viere biwwe daor weer in de auto stapt. Et was goed en mooi dawwe bi’j Roelien west hebben. Et was niet meer zoas et was en dat zal et ok nooit meer wodden. Onderwegens hawwe zo now en dan een haegelbujje en bi’j Scharpenzeel sni’jde et zo slim dawwe de witte strepen op ‘e weg niet meer zien konnen. Dat was best wel een betien griezelig.

Vandemorgen bin ‘k d’r betied of gaon en om kwat veur negen ha’k de oprit al vri’j van sni’j. D’r was vannaacht nogal wat kommen. Dat ik hebbe drekt mar anpakt en bin mit een schoever an de gang gaon. Dat was gezond wark. Ik hebbe een peer weken gien fysio had. Sni’jschoeven is dan een goed alternatief.