Sni’j, storm en regen

We kriegen vannaacht en morgen nog mal weer over oons henne: sni’j, storm en regen. Dat zeggen de geleerden. Ik hebbe al bericht kregen dat fysiosport morgen niet deurgaot. Butendat he’k de kapper veur morgenmiddag ofzegd. Ik zal morgen wel weer sni’jscheppen en -schoeven moeten. Ik zal now zaoterdagmiddag naor de kapper. Zundag is mien verjaordagsfesien in et mfc. Dan wodt et dreug en ok wat zunnig weer. Mar et wodt wel roetkoold. Now ja, dat kan dan wel deurgaon. Tegen de koolde kuj’ wiethoevule laogen kleren antrekken. Ik kreeg bericht van et mfc dat vri’jwilligers alle parkeerruumte sni’jvri’j maeken zullen. Dat is mooi!
Ik hebbe vandemiddag een kollum in klad schreven over oonze nationaole held Pieter Stoevezaand. Ik warke et stokkien laeter wel uut. Butendat he’k alvast toch mar wat verhaelen rippeteerd veur een optreden van ankem weke woensdagmiddag. Ik zal dan naor Tjerkwerd te vertellen. Dat is een beheurlike tippe uut de rook.