Sneekermeer

Et was vandaege een uutgezochte dag en gao mit de boot et waeter op. Dat hewwe dus daon, van 10 ure vandemorgen tot 6 ure vandemiddag. We hebben de weerberichten de hiele dag in de gaten hullen vanwege et noodweer dat onderweg is. We bin over de Swette via Oosterwierum en Scharnegoutum naor Sneek veerd. En doe over et Sneekermeer henne richting Terhorne. Et was prachtig weer. Niet altied zunne, mar vaeke wel, en een temperetuur die opleup naor 27 graoden. Et is fantastisch en veer dwas over et Sneekermeer. In Grou hewwe anlegd bi’j et terras van hotel Oostergo. We hebben drinken besteld en elk hamburgerties mit petat. Et drinken kwam wel, et eten niet. Et maegien vertelde dat et even langer duurde omdat ze een groep hadden te eten. Wi’j dochten dat d’r een flut volk in et gebouw zat. Mar dat was niet zo, die groep was een koppeltien van ongeveer 7 meensken dat ok op et terras zat en 20 menuten nao oons kwam. Doe we daor een ure zeten hadden, hawwe schone oons nocht. Dat ik bin et hotel inlopen en hebbe zegd dawwe oons nocht hadden, een ure waacht hadden en dawwe opstapten. Dat ze de krits kriegen konnen en de krats d’r bi’j he’k niet zegd, mar wel docht. Ik hebbe nog wel netties zegd dawwe et drinken wel betaelen wollen. Now ja, ekskuses en et drinken hoefden we niet te betaelen. Mit de honger in de huud biwwe de boot weer ingaon. Gelokkig hewwe altied Snelle Jelles bi’j oons, dat daor hewwe elk twieje van opeten. En doe biwwe naor et noorden veerd en et slechte weer veur bleven. Een dikke min dus veur hotel Oostergo in Grou. Hieronder twie foto’s van een veerder heerlike dag. Boven: hier veren we deur Scharnegoutum. Onder: dit mooie schip kwam oons bi’j Ooldeschouw integen.