Sneek

Gister was et gien mooi weer, dat ik bin de hiele dag wat an ’t opredden west en ik hebbe weer es an ’t bakken west. Een kruudkoeke en een ontbijtkoeke die beidend slimme lekker wodden binnen. Gisteraovend he’k geneuten van et Bevri’jdingskonsert op ‘e Amstel. Et liekt altied zo mooi as et donker wodt en dan al die lochies op et waeter. En netuurlik blift et ofscheidslied We’ll meet again van Vera Lynn prachtig. Wat is dat toch een mooi lied!

Vandemiddag he’k bi’j Jelle en Gerda in Sneek op vesite west. We hebben gezellig praot en… ik bin mit Jelle naor een groot en veural leeg parkeerterrein reden. In de eerste weke van juli zuwwe tegere een midweke vot mit mien ni’je auto. Een automaot… En die is Jelle niet wend. En as ik ziek, zwak en misselik wor, moet hi’j d’r wel in rieden kunnen. Dat we hebben vandemiddag oefend. Even mar wol hi’j nog remmen mit et linkerbien, dat moch dus niet. Mar veerder gong et prima. Hi’j het meer technisch inzicht as dat ik hebbe. Ie hebben zoks of ie hebben et niet… Ik hadde mien ni’je laptop ok bi’j me. Awwe een midweke vot binnen wi’k wel graeg dat disse dagboekstokkies deurgaon kunnen. Ik hebbe mit heur wifi dus perbeerd en komme op internet. Et wol niet. Wat hewwe dan toch verkeerd daon? We snapten d’r mit ’n drienend niks van. Et is onbegriepelik. Zo technisch wawwe dus ok weer niet. Hoe moe’k dit dan veur mekeer zien te kriegen? Ik hebbe vanaovend lekker waarm eten bi’j heur had. Eerpelties mit grune boonties mit spekkies d’r deur en een keze-schinke vinke. En doe nog wat roomyoghurt nao. Wat wil een meens nog meer!