Johan Veenstra
Stellingwarver schriever en verteller

Sneek

Plaetst op 8 feberwaori 2023.

Naodat d’r al een man van Omroep Frieslaand-radio beld hadde, wodde ‘k gisteraovend beld deur een journalist van et Friesch Dagblad mit de vraoge wat ik van de doodsbedreiging van Pim Lammers vun. Ik hebbe him ok verteld wat ik daor van vun. Vandemorgen he’k naor kammeraod Jelle in Sneek west en him fielseteerd mit et vermeerderen van jaoren. Ik bin weer deur de Preenses Margriettunnel reden. Mit een kalm gangegien maj’ daor now weer deur. Ik hebbe tussen de middag ok miteten in Sneek. Dat was makkelik, zodoende ha’k thuus gien drokte. Doe ‘k om kwat veur twieje in Sneek weer in de auto stapte, bin ‘k drekt begonnen mit et rippeteren van verhaelen veur een optreden van vanaovend en daor bin ‘k thuus mit deurgaon. En now mar hopen dat et d’r allemaole een betien goed inzit. Hieronder nog een foto die ‘k gistermiddag maekt hebbe in de buurtschop Zwatte Haene. Dit is et broonzen beeld van de sliekwarker dat maekt is deur Frans Ram en daor op ‘e zeediek staot.