Sneek (2)

Poes Marja was gister hielemaole wild in de kop vanwege de storm. Hi’j duste eerst niet butendeure omdat de wiend in de bos naost et huus allemachtig vule lewaai gaf. Doe sprong hi’j toch et huus uut, vleug as een wildeman deur de tuun henne-en-weer, steuf in een boom en kwam doe mit grote sprongen et huus weer in. Now wet poes ok wat storm is.

Vandemorgen he’k zien hoe as Irene Schouten heur dadde goolden medallie op ‘e Olympische Winterspeulen wun. Wat knap! Ze staot now op ‘e zelde hoogte as Ard Schenk en Yvonne van Gennip. Die flikten dat keunsien indertied ok. Vandemiddag ha’k twie vesites an de Tjalkstraote in et mooie Sneek. Ik bin eerst op vesite west bi’j Hans en Thea van der Meulen. Hans wodde vandaege 85 jaor! Ik verzaemele al jaoren postzegels veur heur. Gewoon de stempelde postzegels die op brieven zitten. Die knippen zi’j dan netties uut en die verkopen ze an haandelers. Zo hebben ze in veertig jaor tied al veur 260.000 euro bi’j mekeer gadderd. De opbrengst is veur et bestrieden van en onderzuuk doen naor de taoisliemziekte. Daor hebben ze indertied twie kiender an verleuren. Wat een mooi en goed doel! D’r bin meer as driehonderd meensken over de hiele wereld die postzegels veur heur verzaemelen en heur die opsturen of zoas in mien geval brengen. Ik hebbe groot respekt veur heur. As jim ok postzegels veur heur verzaemelen willen, jim kun ze an mi’j geven, dan zorg ik wel dat ze es een keer in Sneek kommen. Doen! Vervolgens bin ‘k in etzelde appattementekompleks naor Jan en Griet Kroes gaon, Stellingwarvers in de vremde. Ankem weke bin ze zestig jaor trouwd. Tien jaor leden he’k bi’j heur optreden. Doe Jan op ‘e laeste Eupen Stal mien boek Et liek in de Lende kocht, hewwe ofpraot da’k es een keer bi’j heur op vesite kommen zol. En die belofte bin ‘k vandemiddag naokommen.