snackbar

Hopelik was et vandaege veurlopig de laeste snackbardag. Vanaovend zal et gezag ongetwiefeld bekendmaeken dat de hieleboel versoepeld wodt. Dan kun we weer naor een museum of een dieretuun en an et aende van de dag heerlik argens eten in een resteraant. Wat bin ik daor toch an toe! Dat betekent wel dat de dagboekstokkies op zokke daegen eerst laeter op ‘e aovend te lezen binnen. Now is et haost gewoonte dat ze om zes ure aovens henne te lezen binnen, mar dat lokt dan niet meer. Ik hebbe zo staorigan weer een mooie koppel lezers en die moe’n dan veural niet daenken dat d’r wat verschrikkeliks gebeurd is, da’k dood onder an de trappe ligge of zo. Ik bin dan gewoon nog op ‘e vlieg, an ’t geld uutgeven en nog (lange) niet thuus. Zodoende he’k dan nog gien dagboekstokkien schrieven en versturen kund! Mar wat in et vat zit… Vandaege hewwe naor de Praxis in Wolvege west om nog drie rookmelders veur me te kopen en die bin ok allemaole in huus bevestigd. Ik hebbe now vier van die dingen en kan tien jaor mit dat spul veuruut! Bi’j de Welkoop hewwe een flut voegelvoer kocht, want we moe’n die mooie besies goed de winter deurhelpen. En ja, doe biwwe dus naor de snackbar bi’j de Koepelbos in Berkoop west om wat lekkers op te haelen wawwe even laeter thuus opeten hebben. Kiepe-saté, een brotien kroket en een frikandel. Percies etzelde as vleden weke. Mar ankem weke is alles gelokkig weer aanders!