Slim roezige dag

Ik hadde gister niet mit de tuunmannen ofpraot dat ze vandaege drekt ok weer kommen zollen. Dat ik was nargens op vervat. Mar vandemorgen om acht ure wodde d’r beld. Ik was wel van bedde, mar hadde de kleren nog niet an. Tuunman Jaap was al bi’j huus en Rino zol ok nog kommen. Ze zollen de tuun winterklaor maeken, alle blad opredden, een boom ommezaegen die op starven nao dood was en de waetertonne zol plaetst wodden. Ik hebbe een mooie hoolten waetertonne overneumen van Baukje uut Steggerde. Mar ja, ik mos vot om te vertellen in de biebeltheek van Et Vene, dat ik kon gien koffie veur heur zetten. Niks an te doen… Ik bin naor Et Vene gaon en daor he’k lekker vertellen kund. Vlakbi’j de meensken, zo he’k et et liefste. D’r kwam een hiele flut volk, dat d’r weren gien stoelen genoeg. D’r weren tussen de 110 en 120 meensken. Mien hemel nog an toe… Niet allienig uut Et Vene, mar ok uut Wolvege, Rottum, Suntjehannesge, De Jouwer, Luxwoolde, Zaandpol en Slien. En lichtkaans uut nog wel meer plakken. D’r weren goeie vrunden en tal van oold-kollega’s van de belastingdienst. Hiel mooi! Sommigen mienden dat dit mien alderlaeste optreden was, mar dat is vanzels niet zo. Ik schreef in dit dagboek dat ik tien jaor leden ok in de biebeltheek van Et Vene west was. En as zoks ien keer in de tien jaor is, zol dit daor grif de laeste keer wezen. Ik hadde graeg mit alderhaande meensken nog even praoten wild, mar daor is dan de tied niet veur. Butendat weigerde de parkeerautomaot ien van de euromunten die ‘k d’r ingooide, dat ik hadde permissie en stao daor tot percies kwat veur twaelf. Ik was krek twie menuten eerder weer bi’j de auto. Ik vun et een mooie morgen! Thuus weren de beide tuunmannen drok an et wark. Ik hebbe doe gauw een panne soep klaormaekt en ze hebben heur broggien in huus opeten. In de loop van de middag he’k asnog koffie veur heur zet. Morgenmiddag komt Rino nog een keer, dan om de regentonne an te sluten. Mar dan blief ik niet thuus, morgen zuwwe d’r even op uut. Dat mag ok wel nao al die drokke daegen. Mar om huus henne is et now hatstikke netties!