Slim drokke dag

Et was vandaege verschrikkelik drok op ‘e Eupen Stal. Et volk kwam bi’jtieden mit kloften de deure in en gong d’r mit kloften ok weer uut. Et is vanzels ok prachtig Eupen Stal-weer. Harry en Frans kwammen ok langes en ik kreeg een kedogien van heur. Op ‘e eerste dag van de Eupen Stal kreeg ik van Jannes Westerhof et prachtige boek Blauwblomme van Binie Bos. Ik hebbe et haost uut. Morgen meer over dat boek. Van Harry en Frans kree’k de literaire thriller Vrij Uitzicht van Anya Niewierra. Dit is mien vierde boek van die schriefster. Mar wat mooi! Ik bin gek op kedogies! Ik hebbe weer mit een protte meensken praot. Et laeste mit een stel uut Twente. Hi’j was een Twent, zi’j een Friezinne. En… ze hadden aenlik nooit spul. As je zoks verteld wodt, kuj’ om zes ure mit een gerust gevuulte de deure aachter je dichtedoen.

De laeste daegen staon d’r foto’s onder de dagboekstokkies. Foto’s van om et gebouw van de Schrieversronte henne. Keunst van Eupen Stal staot ok in de tuun van de prachtige Villa Vredewoud. D’r wodt me vaeke naor die mooie huzen in Berkoop vraogd. Ik moet niet allienig boeken verkopen kunnen, mar ok van alles vertellen kunnen over de Schrieversronte, et Stellingwarfs, et Nedersaksisch, de Stellingwarven, Berkoop en de mooie huzen in Berkoop. Et is niet zomar wat! Villa Vredewoud is een Jugendstil-achtige villa uut 1899 en wodde vroeger bewoond deur de femilie Willinge Prins. Iene breur van de femilie woonde op Vredewoud, de aandere op et ok al mooie Lunia, dat now een hotel is. Vredewoud staot trouwens te koop veur ietsien meer as een miljoen. Zo wodde me dat temeensen verteld. Kiek vanaovend mar es waj’m in et fikkebusien zitten hebben. En as ’t ok mar wat lieden kan, zo’k et mar doen. Dan kommen jim in et mooiste huus van et mooiste dörp van de Stellingwarven te wonen!