Skûtsjesilen

We bin een hiele lange dag op et waeter west. Van vandemorgen 10 ure tot 7 ure vanaovend. Et was een heerlike dag. Zunneschienweer, weinig wiend en een oplopende temperetuur tot 29 graoden. We bin naor et skûtsjesilen west. Ik was ien keer eerder bi’j et skûtsjesilen. Hiel lange leden. Doe ik nog kollumnist was bi’j Omroep Frieslaand–radio moch ik mit op ‘e Omroep Frieslaand-boot. Doe gavven de ikonische Klaas Jansma en Sippie Tigchelaar daor verslag van op ‘e radio. We bin vandemorgen naor Eernewoolde veerd, we kwammen daor de skûtsjes van Grou en Eernewoolde al integen. We zaggen een protte boten mit feestvierend volk mit ongetwiefeld nogal wat kratten pils in de boot. Misschien hadden wi’j dat ok wel, mar daor vertel ik veerder niks van. Veurdat alles bi’j en in Eernewoolde ofsleuten wodden zol biwwe naor De Veenhoop veerd en we hebben tussen 2 en 3 ure eten op et terras van hotel-resteraant Ie-Sicht. Een heerlik twaelfuurtien! Ik wodde daor herkend deur een vrouw uut Witte Peerden, die was bi’j mien optreden veur de vrouwludeverieninge van Willemsoord in et veurige vertelseizoen. Et skûtsjesilen was gister op ‘e Veenhoop, de grote feesttente ston d’r nog. In die tente gaon as d’r flink wat pils op is, de t-shirties van de kerels uut, die wo’n dan an mekaander kneupt en dan touwgienspringen ze daor mit. We hebben ofpraot dawwe daor ankem jaor ok an mitdoen zullen. Ik moet dus fit blieven! Nao et eten biwwe weer naor Eernewoolde gaon. Et was zwat op et waeter van de boten en boties. Op twie plakken hewwe et skûtsjesilen van een ofstaand zien kund. Et slot hewwe hiel goed zien kund, doe veerden we tussen een armada van boties tot vlak bi’j de finish. A’k et goed zien hebbe was Et Vene de laeste. Wat een prachtige dag! Hieronder drie foto’s. De skûtsjes van Eernewoolde en Grou en et skûtsjesilen veur hotel-resteraant Princenhof.