Sjoen stukske Limburg

Et is de laeste daegen slim wienderig. Ik bin vandemiddag nog even op ‘e fiets naor Wolvege west om wat bosschoppen op te haelen. A’k dan weer thuuskomme van vekaansie he’k van alles in huus en hoef ik votdaolik niet naor de winkel. Aanst moe’k nog wat spul inpakken, mar daor he’k nooit vule tied veur neudig. Ik griepe wat bi’j mekeer en stoppe dat in een tasse. En dan mar hopen da’k niks vergeten hebbe a’k daor ginderd te plak bin. Et is echt vekaansietied, want de iene nao de aandere ansichtkaorte roegelt hier in de brievebusse. Meensken die mi’j iene sturen kriegen ok iene weeromme. D’r kwam een kaorte van Haarm en Jacob die in et glooiende Zuud-Limburg binnen of west hebben.