Sjemkoken

Ik bin de laeste peer weken iederkeer an ’t sjemkoken west. Vandemorgen veur de laeste keer. Dat komt zo… Anke, die hier et huus schonehoolt, het rooie beiepollen en jaors dus ok flutten rooie beien. Ze het vleden jaor hiele flutten in de vriezer stopt mit staelties en al. Mar ja, now kwam ze tot de ontdekking dat ze vusen en vusen te vule het en de vriezer mos schonemaekt wodden. Dat as ik een flut hebben wol? Aanders wodden ze votgooid. Now, netuurlik wol ik wel wat hebben, want a’k argens een hekel an hebbe is et an eten votgooien. Dat vien ik een schaande! En doe kwam Anke dus mit een enorme flut rooie beien die ik drekt weer bi’j mi’j in de vriezer stopt hebbe. En doe zo now en dan an ’t sjemkoken. Wat een wark. Ik mos in wezen duzenden rooie beien van de staelties haelen. Mar vandemorgen he’k de laeste boel beredded en now he’k dus 20 potten rooie beiesjem. Ik hadde ok nog 15 potten aandere soorten sjem staon, mit mekeer he’k now dus 35 potten zelsmaekte sjem in de kaaste staon. Dat is een mooi, riek en lekker bezit! Laot de winter asnog mar kommen, ik redde me wel mit de sjem!