Sjemkoken

Ik kreeg zes mooie reakties op mien kollum Efteling in de Liwwadder Kraante. Gister via mail of app: drieje uut Liwwadden, iene uut Wolvege en iene uut Noordwoolde. En vandemorgen hul me in de supermark nog een vrouw uut Steggerde staonde vanwege de kollum over Geert en Marjolein. Gien haatmails dus. Die hebbe ik trouwens wel es had, mar dat is wel meer as tien jaor leden. Anoniem vanzels, want de meensken die zoks doen bin gien helden mar zielepieten. Ik was een aekelike linkse rotzak en ik mos es weten wat ze bi’j de Schrieversronte in Berkoop echt van me vunnen en zeden.

Omdat et vandaege en morgen niet echt mooi fiets- en votgaondersdaegen binnen doe ‘k aandere dingen. Ik was vandemorgen om negen ure al op ‘e mark in Wolvege. Daor he’k erebeien en blekbers kocht. Dat zodoende he’k vandemiddag zes potten mit erebeiesjem en vier potten mit blekbersjem maekt. Heerlik! Ik bin van doel en bakke morgen een kruudkoeke mit rezienen, sukade en gember. Butendat za’k rebarbercompote maeken, want ik kreeg rebarber van Anke uut heur volkstuun. En dan he’k de daegen toch goed besteded, liekt me zo toe.