Sisi

Ik geniete disse hiele weke van de serie Sisi. Prachtig spel! Dit is toch werachtig vule mooier as de beroemde Sisi-films van Romy Schneider en Karlheinz Böhm. Dat was zute romantiek, dit is vule realistischer en meer waorhiedsgetrouw. Zo mooi was et leven van Sisi niet. Et was toch ok vreselik dat as ze een kiend kreeg, dat heur man Franz Joseph, heur schoonmoeder en et hiele hof daor dan bi’j stonnen te kieken. Wat een vertoning. Mar dat was vroeger in die kringen overal zo. Et wodt vanaovend weer genieten. Sisi maekt heur belangrieke reize naor Hongeri’je.

Ik hebbe et vandaege zo drok had as een klein baosien. Ik hebbe een kollum schreven en bewarkt. De titel is Veenarbeiders. Ik stamme van veenarbeiders of, mien aachternaeme zegt wat dat anbelangt genoeg. En die veenarbeiders wodden vroeger behaandeld as slaven. Dat ja… Ik hebbe ok een bitterkoekieskeek bakt. Een dag of wat leden he’k een kruudkoeke mit rezienen, sukade en gember bakt, dat ik hebbe de vriezer vol lekkers zitten. En netuurlik he’k de verhaelen en gedichten goed rippeteerd veur morgen. Dan ma’k om vier ure middags optreden mit Grytsje Kingma in De Schierstienze in Veenwoolden. Iederiene mag d’r henne. Et is et laeste optreden van dit jaor!