Johan Veenstra
Stellingwarver schriever en verteller

Sensor

Plaetst op 24 november 2022.

Vandemiddag he’k een monteur van Energie Service Frieslaand bi’j mien cv-ketel had. Et was een jongkerel uut Sneek die een jonge bi’j him hadde die de keunst van him ofkieken mos. De laeste daegen knipperde d’r de hieltied een rood laampien, dat nao een peer tellen ok weer op gruun sprong. Et helse apperaot gaf dan storingskode 10F an. Zoks is vervelend en ik bin mit zokke dingen altied bange dat de boel ontploffen zal of zo. Mar ik hadde dus nog wel verwaarming en waarm waeter. Mar ja, stel dat dat ding veurgoed op rood springen zol. Ik wete niks van al dat spul of en vien et mar een wippel spullegien. De monteur zee dat d’r een ni’je sensor in mos. Wat dat ok wezen mag… Gelokkig dat hi’j zoe’n ding bi’j him hadde. En hi’j het ok een keuperen buize vervongen die onder de kalk zat omdat et lekt hadde. Hopelik is now alles weer goed en begint et laampien niet opni’j rood te knipperen. Ik hebbe groot respekt veur meensken die zokke technische dingen snappen en d’r wat an doen kunnen. Mar och, misschien dat die jonge monteur uut Sneek wel gien roman schrieven kan.