Schut

Vandaege bin de tuunmannen Arnaud en Jacco d’r de hiele dag weer west, dat ik hebbe weer veur koffie, zelsbakte boerekeek, soep en frisdraank zorgd. Et schut is now klaor en et is hiel mooi wodden. Ze hadden de tuun ok nog winterklaor maeken zuld, mar daor ontbrak heur de tied veur. Dat moet dus nog gebeuren. Wanneer ze weer kommen weet ik nog niet. Ik hebbe intied nog wat verhaelen rippeteerd veur et optreden van morgenvroeg. Ik bin ok begonnen mit et schrieven van de ongeveer 120 kast- en ni’jjaorskaorten. Daor bin ‘k nog lange niet klaor mit. Ik hebbe ok nog een kastkollum schreven. Ik perbere altied zo aktueel meugelik te wezen, mar ik hebbe altied wat kollums as reserve liggen. Dat geft me een goed gevuul. Et moet me niet drieven, daor kan ‘k min over. En dan he’k altied wat liggen a’k de koolde pip hebbe of wat krap in de tied zitte.