Schrieversronte 50

Vandaege bestaot de Stellingwarver Schrieversronte 50 jaor. Ik wete nog hiel goed dat Haarm en ik al die jaoren leden op ‘e middag van de 29ste april 1972 naor de ulo in Wolvege west hebben veur wat aachterof bekeken een soortement oprichtingsvergeerdering was. Jannes Nijholt, ien van oonze ulolerers, kwam oons daor integen en praotte Stellingwarfs tegen oons. Dat hadde hi’j al die jaoren op ‘e ulo nog nooit daon. Haarm en ik schreven doe al gedichten/verhaelen in de rebriek Uut de pultrum van de Stellingwarven in de Liwwadder Kraante. De Schrieversronte het een protte uut de wege zet in die vuuftig jaor. En toch zo’k et niet nog een keer overdoen willen. Al dat wark nog een keer doen… Al die boeken nog een keer schrieven… Et zol me angriezen. Et feest angaonde die 50 jaor wodt laeter hullen: op 25 juni. In de kraanten wodde d’r gister en vandaege alvast rejaol andacht an geven. In de beide Stellingwarver kraanten ston een artikel mit foto’s over twie pagina’s van Lourens Looijenga. Mit daank an Harmen Houtman ston d’r ok een groot artikel van Elisabeth Post in de Liwwadder Kraante. D’r bin zorgen over de toekomst, want d’r wodt de hieltied minder Stellingwarfs praot. Mar we moe’n de kop d’r toch mar veur holen!

Ik hebbe vandemiddag et jaorlikse daarmonderzuuk had en bin bliede da’k d’r weer veur een jaor of bin. Intied dat ik in de soeze in et ziekenhuus lag, het Anke de boel hier schonemaekt. Haarm het me zokrek weer thuusbrocht. Ik bin now hiel dustig, want ik bin een protte vocht kwietraekt. Ik geve me vanaovend lekker daele veur de tillevisie. As d’r temeensen wat veur is wat me interessseert. De laeste vier aovens he’k naor de prachtige nts-serie over Wilhelmina keken. Dat vun ik hiel mooi! Wat et daarmonderzuuk anbelangt: et zag d’r bi’j mi’j van binnen goed uut! Zoks is altied een hiele stiekel uut de voete!