Schrieven

Ik hebbe vandaege wat lezen en schreven. Ik hebbe twie kollums schreven veur de kraante en die netties uuttikt. Iene over et 50-jaorig bestaon van de Stellingwarver Schrieversronte en iene over et Lendepattien. Daor he’k in et verleden al vaeker over schreven… Dit is de vierde kollum over dat bewuste pattien tussen Kontermaans en Wolvege. Et is now hiel makkelik da’k wat kollums liggen hebbe. Dan drift et niet, want d’r moet niks drieven. Daor kan ‘k echt niet over en zeker now niet. Ik hebbe ok wat gegevens opschreven veur twie langere verhaelen die ‘k nog schrieven wil. Ik kreeg de laeste weke zomar twie ingevings. Die blieven bi’j mi’j mar kommen. Pim Lammers, daor a’k dat mooie kienderboek van vertaeld hebbe, vertaelt zels ok kienderboeken vanuut et Engels in et Nederlaans. Mar hi’j schrift ok veur grote meensken. En hoe! Die verhaelen van him he’k de laeste daegen lezen en doe kwam ik zomar op een idee veur een verhael. En vandaege veur een weke wa’k in de Aachterhoek. Eindelik kwam ik doe ok es in et stattien Terborg. Ok daor kree’k een ingeving veur een verhael. Terborg ken ik vanzels uut et gedicht Het Vogelschieten van A.C.W. Staring. Die beroemde dichter woonde eertieds op kesteel De Wildenborch in Vorden. En dat ok al beroemde gedicht van him begint zo:

De Herfstmaand had haar taak voleind;
De vreugd was in Terborg.
Daar at men, koek bij ’t kermisbier,
En droomde van geen zorg.